Chokokue rembiapo ha’e ñeñangareko tekovére

Nelson Quintana ha’e karai mba’apohára ohechaukáva Paraguái chokokue rekove teete ko’ãgagua. Ko jehaipy rupive jaikuaa’ypýta chupe ha mba’e mba’épa umi temiandu oguerekóva jajehekombo’e haĝuã hendive.

 

Ko karai oiko táva Curuguaty okárare, Canindeyu departamento-pe. Oguereko hembireko ha mokõi mitã ipehênguekuéra. Upe itekohápe oñemitŷ avati, manduvi, kumanda, mandi’o, pakova, piña, merõ, sandía ha hetave mba’e. Omongakuaa mymba mimi ha’éva vaka, kure, ryguasu ha avei oguereko hymba guéi ha kavaju omba’apóva kokuépe.

Ko’ã mba’e rupive ha’ekuéra oñandu hetepy ha hi’ãngape  mba’e mba’épa umi apañuái oĩva ára ha ára chokokue rekovépe oñeha’ãnguévo omotenonde haĝuã hekovekuéra.

 

NelsonQuintanaLibro-300x293 Chokokue rembiapo ha'e ñeñangareko tekovére

Chokokue rembiapo ha’e tekove ñeñangareko. Péva he’ise chokokue omba’apoha opáy guive oke peve omoingove haĝuã maymáva rekove tembi’u’apo rupive. Jaikuaaháicha, ñane retãme ha’e chokokue rembiapo umi hetave hi’upyrã ojapóva ha omoguahêva opárupi mesa ári jakaru porã haĝuã.

Upéicha avei, Nelson Quintana ikatupytyeterei omoñe’ê haĝuã hekove mbarakapu ndive ha omosarambi katuete Whatsapp ha Facebook rupive. Péicha, aréma ojekuaa oikóvo ñane retãme opaichagua tapicha ohecharamõva chokokue rekove apytépe. Ikatu ojeheka ichupe Facebook-pe ojehecha haĝuã hembiasa.

http://<a href=»https://www.facebook.com/nelson.quintana.56863″></a>

Omoñe’ê porãháicha avei ha’e ohaikuaa ñe’êpoty guarani ha castellano-pe. Ha ko’ãga ojekuaave ohóvo hina ohai ha omoherakuã rire peteî aranduka hérava “Chokokue Sapukái” oguerekóva ipype ñe’êpoty chokokue rekove rehegua.

Ipahaitépe, hi’ãnte jahecharamo ha ñamomba’eguasu ñande rapicha rembiapo, omoñe’êva ha ohechaukáva maymávape guarã: chokokue remiandu ha kéra yvoty oguerojeráva hi’ãnga mbytete guive.

Ohai Ivan Britez.